الواسطة

قبل كم أسبوع كنت مقدمه على وظيفة جديدة في نفس مكان عملي
و أنا ما احسد نفسي بس أنا عارفه أنا شنو و شنو إمكانياتي و شنو اقدر عليه و شنو ما اقدر عليه و طبعا ما قدمت علي هذي الوظيفة إلا أنا متا كده إني قدها و المشتغل معاي يعرف هذا الشيء

المهم يوم المقابلة مديرتي عطتني كم دعاء اقرأه قبل ما أدش علي إلي بقا بلوني
و دخلت عليهم و أنا كلي ثقة بنفسي و كان استقبالهم وايد حار لي و كلهم يعرفوني من سنين و عارفين شغلي و شكثر أنا مساهمه في العمل و جاوبت على كل أسئلتهم و اشكروني و طلعت

بنفس اليوم دق علي واحد من زملائي بالعمل مقدم علي نفس الوظيفة

زميلي: هلا ورده ....اشلونج ؟

ورده: هلا والله ... شخبارك ؟؟

زميلي: هااااا بشري شنو صار وياج بالمقابلة ؟؟

ورده: ولا حسيتهم وايد مستانسين و جاوبتهم علي كل الاسئله و كانوا وايد يشجعوني

زميلي: صج اسئلوج ؟؟

ورده: إيه ...يعني مقابله أكيد بيسئلوني

زميلي: عاد تصدقين أنا ما سألوني شيء كلش عن الوظيفة بس اقعدوا شلون عمك بو فلان و شلون الوالد و بس سوالف عاديه

ورده: وييييييهههههههه ؟؟ ليششششش؟

زميلي: ما ادري

ورده: ...........( مستغربه) لا تحط ابالك و انشاءالله خير

زميلي: انشاءالله

ورده: اوكي عيل ....خل نشوفك بالاجتماع الشهري .....باي

زميلي: باي


سكرت الموبايل و أنا وايد مستغربه ليش ما سألوه بس قلت أكيد لأنه ما صارله وايد ويانا بالشغل و ما يبون يحرجونه ......يحليلهم والله خوش ناس


بعد أسبوع كلمت رفيجتي إلي تشتغل في قسم التوظيف

ورده: هلا اشلونج ؟

رفيجتي : بخير الله يسلمج

ورده: بشري شنو صار علي مقابلتي ؟؟

رفيجتي: ما انقبلتي

ورده : ..............هدوء

رفيجتي: أنا مو قلتلج خلي عمك يكلمهم

ورده: شكو يكلمهم ؟؟ أنا عارفه إني اقدر أوصل من غير ما يتدخل احد مثل ما توظفت و وصلت حق وظيفتي الحالية

رفيجتي: الصراحة أنتي بالمقابلة كنتي من التوب 4 بس وايد غيرج و اقل منج كلموا أهلهم و توسطولهم و انحطت اساميهم فوق أسمج

ورده: اها ......(.مصدومة و ضايق خلقها)

رفيجتي: لا تضيقين خلقج أهما الخسرانين و لما يحطونهم بالوظيفة صدقيني راح يتوهقون و كل واحد فيهم راح يثبت لهم غبائه و أكيد بيتحسفون

ورده: وشعقبه ؟؟

رفيجتي: ...............

ورده: خلاص مشكورة ....اكلمج أنا بعدين ....مع السلامة

رفيجتي: لا يضيق خلقج ........باي


أنا كنت حزتها حدي محتره

و حسيت أنى فيني بجوى

و مقهورة

و وايد أشياء قامت تدور براسي
أرد أفكر بالمقابلة و أتذكر كلامهم لي

و شكثر كانوا مستا نسين من اجو بتي

و يضيق خلقي
قعدت اشوي و عقب دقيت علي أمي و قلتلها إني ما نقبلت

و طبعا أمي يا بعد عمري ما قصرت بالكلام إلي قالته لي من تشجيع و قالتلي لا يضيق خلقج و لا تتكدرين و انشاءالله مره ثانيه يقبلونج و خيرها بغيرها


عقب كم يوم دق علي زميلي بالدوام إلي ما سألوه شيء بالمقابلة

زميلي: هلا ورده

ورده: هلا...اشلونك؟

زميلي: باركيلي انقلبت حق الوظيفة

ورده: صج ......مبروك تستاهل

زميلي: و أنتي ؟؟ أقبلوك ؟؟؟

ورده: لا ما اقبلوني

زميلي: افااااااا, ليش؟؟

ورده: لأنه ما كلمت احد يتوسط لي

زميلي : ليش ما كلمتي عمك فلان ؟؟

ورده: بس شكو اكلم احد إذا أنا أحس إني قادرة بنفسي إني أوصل حق الوظيفة

زميلي: ورده شالكلام محد يوصل إلا بالواسطة

ورده: والله إلي راضي علي نفسه يوصل بالواسطة هذا الشيء راجع له و أنا ما أرضى علي نفسي إني أنقبل بالوظيفة بهالطريقه

زميلي: شنو هالكلام الكبير

ورده: طول عمري كلامي كبير

زميلي: علي العموم أنا بس كنت داق أبشرج بقبولي

ورده: مبروك

زميلي: يلا باي

ورده: باي


I have nothing against my colleague at work but what pisses me off are the following points:


مشكلة الواسطة بالكويت متى راح تنحل ؟؟؟

ليش لازم أنكلم فلان و علان عشان نوصل حق إلي نبيه ؟؟؟

ليش ما يحكمون على الواحد بشغله و تقيمه ؟؟

أنا اقدر اكلم وايد ناس و أوصل حق إلي أبيه........ بس ليش ؟؟

و بعدين بقعد أفكر أنا وصلت بمجهودي ولا وصلت لأنه فلان كلم المدير ؟؟





و عسى أن تكرهوا شيئاً و هو خير لكم و عسى أن تحبوا شيئاً و هو شر لكم والله يعلم وانتم لا تعلمون